Sa Isang Kawit

by Maria Charisse Denise B. Bayot

Hubarin ang kamiseta at dahan-dahang tanggalin ang kawit ng bra. Pagkalaan, dito magsisimula ang pagbabago na hindi inaasahan sa mga oras na ika’y nasasabikan.

 Ayon sa Census, ang kabuuang populasyon ng ating bansa ay tumataas ng 2.04 porsiyento taun-taon. Mula noong Agosto 1, 2007, nagkaroon tayo ng kabuuang populasyon ng 88,566,732 tao. Kumpara noong Mayo 1, 2000, tayo ay nadagdagan ng 12,062,655 na tao.

 Sa patuloy na pagtaas ng populasyon ng ating bansa, kasabay nito ang patuloy na pagsilang ng mga sanggol mula sa sinapupunan ng mga ina. At ayon sa 2008 National Demographic and Health Survey, isa sa tatlong batang ipinapanganak o 36 pursiyento ay hindi ninanais ng kanilang magulang (16 porsiyento) o kaya’t wala sa oras ang pagkabuo (20 porsiyento). Ang ilan sa mga nanay na lumahok sa pagsisiyasat ay ang mga kababaihan na nakaranas ng premarital sex.

Sa premarital sex, hindi lamang maagang pagbubuntis ang maaaring maging bunga, maaari ring kapitan ng sakit ang lalake at babae na kabilang. Isa sa mga sakit na ito ay ang STD o Sexually Transmitted Disease. Ang sakit na ito ay maaaring ipasa sa pamamagitin ng pakikipagtalik, panganganak, o kahit ng pagpapakain sa suso. Ang pinakakaraniwang klase ng STD ay ang Chlamydia, Genital Herpes, Genital Warts, Gonorrhea, Hepatitis A, Hepatitis B, Hepatitis C, at Syphillis. Ngunit, hindi lamang STD ang maaaring makuha sa pakikipagtalik, maaari ring makakuha ng HIV at AIDS. Hindi basta basta ang sakit na ito sapagkat nakamamatay ito.  Kagaya ng STD, maaari ito mapasa sa iba sa pamamagitan ng pakikipagtalik, panganganak, o pagpapasuso.

Ayon sa USAID, tinantyang 8700 ang populasyon na naninirahan kasama ng may HIV o AIDS dito sa Pilipinas noong 2009. Ngunit, 60 pursiyento lamang sa kanila ang tumatanggap ng Antiretroviral Therapy. Sa patuloy na paglipas ng panahon, tiyak na mas dadami ang mga tao na mamumulat sa ganitong sakit. Habang maaga pa, tiyakin na mapipigilan ang sakit na makapasok sa iyong katawan at paniguraduhing malakas ang resistensya ng katawan.

Sa paglipas ng panahon, paniguradong mamumulat pa ang ating mga mata sa mas matitinding mga pagsubok na haharapin bilang indibiduwal o bilang bansa. Sana’y magkapit-bisig tayo upang malagpasan natin ang mga darating sa hinaharap. Kung tayo’y magtatalo lamang dahil sa mga bagay na hindi mapagkasunduan, wala talagang isusulong ang ating bayan mula sa ating kinatatayuan. Sa dami ng suliranin ng bayan ngayon, sa maliit na paraan ay unti unti nating iangat ito mula sa kanyang kinahihimlayan. Sa dami ng maaaring negatibong epekto ng isang kaligayahan, sino mag-aakala na magsisimula ito sa isang kawit ng bra?